എക്സോ മാര്‍സ് ചൊവ്വയിലേക്ക് വീണ്ടും

എക്സോ മാര്‍സ് ചൊവ്വയിലേക്ക് വീണ്ടും

സാബു ജോസ് @ ദേശാഭിമാനി കിളിവാതില്‍

ചൊവ്വയിലേക്ക് പുതിയൊരു ദൌത്യം കൂടി യാത്രയാരംഭിച്ചു. റഷ്യന്‍ ഫെഡറല്‍ സ്പേസ് ഏജന്‍സിയുടെയും (റോസ്കോസ്മോസ്), യൂറോപ്യന്‍ സ്പേസ് ഏജന്‍സിയുടെയും (ഇസ) സംയുക്ത ചൊവ്വാ ദൌത്യമായ എക്സോ മാര്‍സ് (Exo Mars) വ്വയിലേക്ക് പുതിയൊരു ദൌത്യം കൂടി യാത്രയാരംഭിച്ചു. 2018ല്‍ വിക്ഷേപിക്കുന്ന എക്സോ മാര്‍സ് റോവറിന് അനുയോജ്യമായ ലാന്‍ഡിങ് സൈറ്റ് തെരഞ്ഞെടുക്കുന്നതും ഷിയാപെറേലി ലാന്‍ഡറിന്റെ ദൌത്യമാണ്.

ഇപ്പോള്‍ വിക്ഷേപിച്ച ടിജിഒ കേവലമൊരു ഓര്‍ബിറ്റര്‍ മാത്രമല്ല. നാല് വ്യത്യസ്ത ദൌത്യങ്ങളാണ് ഈ പേടകം നിര്‍വഹിക്കുന്നത്. കൂടാതെ ഒരു വാര്‍ത്താവിനിമയ ഉപഗ്രഹമായും ഇത് പ്രവര്‍ത്തിക്കും. 3130 കിലോഗ്രാമാണ് ഓര്‍ബിറ്ററിന്റെ ‘ഭാരം. ഷിയാപെറേലി ലാന്‍ഡറിന് 600 കിലോഗ്രാം ‘ഭാരമുണ്ട്. ടിജിഒ യിലെ ഏതാനും ശാസ്ത്രീയ ഉപകരണങ്ങളും വിക്ഷേപണ വാഹനമായ പ്രോട്ടോണ്‍ റോക്കറ്റും റഷ്യന്‍ നിര്‍മിതമാണ്. മറ്റുപകരണങ്ങളും ലാന്‍ഡറും നിര്‍മിച്ചത് യൂറോപ്യന്‍ സ്പേസ് ഏജന്‍സിയുടെ മേല്‍നോട്ടത്തിലാണ്. ഇറ്റലിയാണ് ഈ ദൌത്യത്തില്‍ കൂടുതല്‍ മുതല്‍മുടക്ക് നടത്തിയിരിക്കുന്നത്. ദൌത്യത്തിന്റെ നിയന്ത്രണം നടത്തുന്നത് ഇറ്റലിയിലെ ഗ്രൌണ്ട് സ്റ്റേഷനായ അല്‍ടെക്സ് റോവര്‍ കണ്‍ട്രോള്‍ സെന്ററാണ്. 2018 ല്‍ വിക്ഷേപിക്കുന്ന എക്സോ റോവര്‍ ദൌത്യത്തിലെ 1800 കിലോ ഗ്രാം ‘ഭാരമുള്ള ലാന്‍ഡറും 300 കിലോഗ്രാം ‘ഭാരമുളള റോവറും റഷ്യന്‍ നിര്‍മിതമായിരിക്കും. യൂറോപ്യന്‍ സ്പേസ് ഏജന്‍സിയുടെ അറോറ പദ്ധതിയുടെ ‘ഭാഗമായി നടത്തുന്ന ആദ്യവിക്ഷേപണമാണ് ഇക്കഴിഞ്ഞ മാര്‍ച്ച് 14 ന് നടന്നത്. ഭാവിയില്‍ മനുഷ്യനെ ചൊവ്വയിലേക്കയ്ക്കുന്നതിനും അറോറ പദ്ധതിയില്‍ ഉദ്ദേശിക്കുന്നുണ്ട്. എന്നാല്‍ വരുന്ന പത്തുവര്‍ഷത്തിനിടയിലുള്ള വിക്ഷേപണങ്ങളെല്ലാം റോബോട്ടിക് ദൌത്യങ്ങളായിരിക്കും. റഷ്യ അവസാനിപ്പിച്ച ഫോബോസ് ഗ്രണ്ട് ദൌത്യത്തിനുവേണ്ടി വികസിപ്പിച്ചെടുത്ത ചില ശാസ്ത്രീയ ഉപകരണങ്ങള്‍ എക്സോ മാര്‍സ് ദൌത്യത്തിലെ ട്രേസ് ഗ്യാസ് ഓര്‍ബിറ്ററില്‍ ഉള്‍പ്പെടുത്തിയിട്ടുണ്ട്. 130 കോടി യുഎസ് ഡോളറാണ് പദ്ധതിയുടെ ചെലവ്.

ലക്ഷ്യങ്ങള്‍
ഏതെങ്കിലും കാലത്ത് ചൊവ്വയില്‍ ജീവനുണ്ടായിരുന്നോ, ഇപ്പോഴും ജീവന്റെ സൂക്ഷ്മരുപങ്ങളെങ്കിലും അവശേഷിക്കുന്നുണ്ടോ എന്ന് തിരയുകയാണ് മുഖ്യ ലക്ഷ്യം. മീഥേയ്ന്‍ വാതകത്തിന്റെ സാന്നിധ്യം തെരയുന്നതിലൂടെയാണ് ഇത് സാധ്യമാകുന്നത്. മിഥേയ്ന്‍ ജീവന്റെ അടയാളമാണ്.

• ചൊവ്വയുടെ ഉപരിതലപാളിക്കടിയില്‍ ജലസാന്നിധ്യം തിരയുക. ചൊവ്വയുടെ ഉപരിതലത്തില്‍ ഒഴുകുന്ന ജലത്തിന്റെ സാന്നിധ്യം നാസയുടെ മാര്‍സ് റെക്കണൈസന്‍സ് ഓര്‍ബിറ്റര്‍ കത്തിെയിരുന്നു. കൂടാതെ ധ്രുവ മേഖലകളില്‍ ഹിമാവരണവുമുണ്ട്. ചൊവ്വയുടെ മണ്ണിനടിയില്‍ ഖരാവസ്ഥയിലുള്ള ജലവും ഓര്‍ഗാനിക് സംയുക്തങ്ങളുമുണ്ടെന്ന് സംശയിക്കപ്പെടുന്നുണ്ട്. അവയുടെ സാന്നിധ്യം കണ്ടെത്തുക ഈ ദൌത്യത്തിന്റെ പ്രധാന ലക്ഷ്യമാണ്.
• ചൊവ്വയുടെ ഉപരിതലത്തിന്റെയും അന്തരീക്ഷത്തിന്റെയും സവിശേഷതകള്‍ അനാവരണം ചെയ്യുക. ‘ഭാവിയിലെ മനുഷ്യരുടെ യാത്രകള്‍ സുരക്ഷിതമാക്കാന്‍ ഇത്തരം പഠനം അനിവാര്യമാണ്.
• ചൊവ്വയില്‍ ജീവന്‍ നിലനില്‍ക്കുന്നതിന് സാഹചര്യം ഉണ്ടോ എന്ന് പരിശോധിക്കുക.
ചൊവ്വയില്‍ ഇറങ്ങിയതിനു ശേഷം ഭൂമിയിലേക്ക് മടക്കയാത്ര സാധ്യമാവുമോ എന്ന് പരീക്ഷിക്കുക എന്നിവയാണ് പ്രധാന ശാസ്ത്രീയ ദൌത്യങ്ങള്‍.
സോളാര്‍ പാനലുകള്‍ ഉപയോഗിച്ച് ചൊവ്വാ റോവറുകള്‍ക്ക് ആവശ്യമായ ഊര്‍ജം ഉല്‍പാദിപ്പിക്കുക
• ചൊവ്വയുടെ ഉപരിതലം രണ്ടു മീറ്ററിലധികം കുഴിക്കുകയും സാംപിള്‍ ശേഖരണം നടത്തുകയും ചെയ്യുക.
• ചൊവ്വയുടെ ഉപരിതലത്തിലൂടെയുള്ള റോവറുകളുടെ സഞ്ചാരം കൂടുതല്‍ സുഗമമാക്കുക എന്നീ സാങ്കേതിക കാര്യങ്ങളിലും എക്സോ മാര്‍സ് ദൌത്യം ശ്രദ്ധിക്കുന്നുണ്ട്.

2016 ഒക്ടോബര്‍ 19 നാണ് ഷിയാപെറേലി ചൊവ്വയുടെ ഉപരിതലത്തില്‍ ലാന്‍ഡ് ചെയ്യുന്നത്. ചൊവ്വയുടെ ഭ്രമണപഥത്തില്‍ പ്രവേശിക്കുന്നതോടെ ഷിയാപെറേലി, ടിജിഒ യില്‍ നിന്ന് സ്വതന്ത്രമാകും.. തുടര്‍ന്ന് ചൊവ്വയുടെ ഉപരിതലത്തില്‍ സോഫ്റ്റ് ലാന്‍ഡിങ് നടത്തുന്ന ഷിയാപെറേലി, 2018 ലെ റോവര്‍ ദൌത്യത്തിന് അനുയോജ്യമായ ലാന്‍ഡിങ് സൈറ്റ് കണ്ടെത്തും. ചൊവ്വയുടെ ഉപരിതലത്തില്‍ നിന്ന് ശേഖരിക്കുന്ന വിവരങ്ങള്‍ ടിജിഒ യ്ക്കു കൈമാറും. ടിജിഒ യില്‍ ഉള്ള നാസയുടെ ‘ഇലക്ട്ര’ ടെലികമ്യൂണിക്കേഷന്‍ റിലേ നാവിഗേഷന്‍ ഉപകരണം ഈ വിവരങ്ങള്‍ ശേഖരിച്ച് ഗ്രൌണ്ട് സ്റ്റേഷനിലേയ്ക്കും. 2022 വരെ ടിജിഒ ഒരു വാര്‍ത്താവിനിമയ ഉപഗ്രഹമായി ചൊവ്വയുടെ ഭ്രമണപഥത്തില്‍ ഉണ്ടായിരിക്കും. ഇലക്ട്രിക് ബാറ്ററിയാണ് ലാന്‍ഡറിനാവശ്യമായ ഊര്‍ജം ലഭ്യമാക്കുന്നത്. മെറിഡിയാനി പ്ളാനം (ങലൃശറശമിശ ജഹമിൌാ) എന്നു പേരിട്ടിരിക്കുന്ന സ്ഥലത്താണ് ഷിയാപെറേലി ലാന്‍ഡ് ചെയ്യുന്നത്. മിക്കപ്പോഴും ശക്തമായ പൊടിക്കാറ്റുകളുണ്ടാകുന്ന പ്രദേശമാണിത്.

ഒരു റോവര്‍ ദൌത്യം ചെയ്യുന്ന ജോലി ലാന്‍ഡറിനു തന്നെ ചെയ്യാന്‍ കഴിയുന്ന തരത്തിലാണ് ഷിയാപെറേലിയുടെ സാങ്കേതികവിദ്യ വികസിപ്പിച്ചിട്ടുള്ളത്. ഡ്രീംസ് (Dust characterization Risk assessment and Environment Analyzer on the Martian Surface – DREAMS) എന്ന ശാസ്ത്രീയ ഉപകരണങ്ങളുടെ പാക്കേജാണ് ഷിയാപെറേലിയില്‍ ഒരുക്കിയിട്ടുളളത്. ഇതില്‍ കാറ്റിന്റെ ദിശയും വേഗതയും അറിയുന്നതിനുള്ള Met Wind അന്തരീക്ഷത്തിന്റെ ആര്‍ദ്രത അളക്കുന്നതിനുള്ള Met Humi മര്‍ദമളക്കുന്നതിനുള്ള Met Baro, ഊഷ്മാവ് അളക്കുന്നതിനുള്ള Mars Tem , സാന്ദ്രത അളക്കുന്നതിനുള്ള ഒപ്ടിക്കല്‍ ഡെപ്ത് സെന്‍സര്‍ – ODS റേഡിയേഷന്‍ അളക്കുന്നതിനുളള Micro ares എന്നീ ഉപകരണങ്ങളാണുള്ളത്.

എക്സോ മാര്‍സ് ദൌത്യത്തിലെ രണ്ടാമത്തെ ഉപഗ്രഹവിക്ഷേപണം 2018 മെയ്മാസത്തിലാണ് നിശ്ചയിച്ചിരിക്കുന്നത്. ഈ ദൌത്യത്തിലെ ശാസ്ത്രീയ ഉപകരണങ്ങളില്‍ 80 ശതമാനവും റഷ്യന്‍ നിര്‍മിതമായിരിക്കും. ലാന്‍ഡറും റോവറും റഷ്യന്‍ നിര്‍മിതമാണ്. ലാന്‍ഡറിലുള്ള ലാന്‍ഡര്‍ റേഡിയോസയന്‍സ് എക്സ്പെരിമെന്റ്(LaRa ) എന്ന ഉപകരണവും റോവറിലെ ഹാബിറ്റ് (HabitAbiltiy, Brine , Irradiation and Temperature-HABIT) എന്ന ഉപകരണവും യൂറോപ്യന്‍ സ്പേസ് ഏജന്‍സിയാണ് നിര്‍മിക്കുന്നത്. ലാറ ചൊവ്വാധൂളിയുടെ ഘടന പരിശോധിക്കുമ്പോള്‍ ഹാബിറ്റ് ഗ്രഹത്തിന്റെ ഉപരിതല ഊഷ്മാവും അള്‍ട്രാവയലറ്റ് വികിരണതോതും സമഗ്രമായി പഠിക്കും. ഒരു ‘ഭൌമവര്‍ഷമായിരിക്കും ലാന്‍ഡറും റോവറും പ്രവര്‍ത്തനക്ഷമമായിരിക്കുന്നത്. 2019 ജനുവരിയിലായിരിക്കും റോവര്‍ ചൊവ്വയില്‍ ഇറങ്ങുന്നത്.


Read more: http://www.deshabhimani.com/index.php/special/news-special-23-03-2016/548533

https://en.wikipedia.org/wiki/ExoMars_Programme

http://exploration.esa.int/mars/

The Martian (2015) - ശാസ്ത്ര കല്‍പ്പിത സിനിമ - ഒരു അവലോകനം

****************************************************************************

The Martian (2015) - ശാസ്ത്ര കല്‍പ്പിത സിനിമ 

- ഒരു അവലോകനം.

****************************************************************************

ചൊവ്വാ പര്യവേഷണത്തിനിടയില്‍ സംഭവിക്കുന്ന അപകടത്തില്‍ ടീം അംഗങ്ങളിലൊരാള്‍ ചൊവ്വാഗ്രഹത്തില്‍ ഒറ്റപ്പെടുന്നു. ഈ ആസ്ട്രോനട്ടിനെ രക്ഷപ്പെടുത്തുന്നതും ഗ്രഹാന്തരയാത്രയും പ്രതിപാദ്യമാകുന്ന ഒരു സയന്‍സ് ഫിക്ഷന്‍ ത്രില്ലര്‍ സിനിമയാണ് മാര്‍ട്ടിയന്‍. കഴിഞ്ഞ ദിവസം പ്രഖ്യാപിച്ച 73-ാമത് ഗോള്‍ഡന്‍ ഗ്ലോബ് അവാര്‍ഡില്‍ (Best motion picture, musical or comedy) മികച്ച ചിത്രത്തിനുള്ള പുരസ്കാരം നേടിയ ചിത്രം കൂടിയാണിത്.
.
ആന്‍ഡ്രൂ വെയര്‍ രചിച്ച ഇതേ പേരിലുള്ള നോവലിനെ അടിസ്ഥാനമാക്കിയാണ് ഈ സിനിമക്ക് തിരക്കഥ രചിച്ചിരിക്കുന്നത്.
ഏലിയനും ഗ്ലാഡിയേറ്ററും പ്രോമിത്യൂസും സമ്മാനിച്ച റിഡ്‌ലെ സ്കോട്ട് ആണ് ഈ സിനിമയുടെ സംവിധായന്‍. സേവിംഗ് പ്രൈവറ്റ് റയാന്‍, ഓഷ്യന്‍സ് ഇലവന്‍ സീരിസ്, The Bourne സീരിസ്, ഇന്റര്‍‌സ്റ്റെല്ലാര്‍ തുടങ്ങിയ ചിത്രങ്ങളില്‍ ശ്രദ്ധേയമായ അഭിനയം കാഴ്ചവച്ച മാറ്റ് ഡാമണ്‍ ആണ് ഈ സിനിമയിലെ Mark Watney എന്ന പ്രധാന കഥാപാത്രത്തെ അവതരിപ്പിച്ചിരിക്കുന്നത്.
.
2035ല്‍‍  മനുഷ്യരേയും വഹിച്ചു കൊണ്ടുള്ള നാസയുടെ ചൊവ്വാദൗത്യമായ അരിസ് III (Ares III manned mission to Mars) പര്യവേഷണ സംഘത്തിന് അവിടെ വച്ച് ശക്തമായ ഒരു പൊടിക്കാറ്റിനെ നേരിടേണ്ടി വരുന്നു. ചൊവ്വയില്‍ നിന്നും രക്ഷപ്പെട്ട് അവരുടെ കണ്‍ട്രോള്‍ വാഹനമായ ഹെര്‍മെസിലെത്തുന്നതിനിടയില്‍ പൊടിക്കാറ്റില്‍ പെട്ട് ഒരു ആസ്ട്രോനട്ടിനെ (Mark Watney) അവര്‍ക്ക് ഉപേക്ഷിക്കേണ്ടി വന്നു. കമ്യൂണിക്കേഷനൊന്നും ലഭിക്കാത്തതിനാല്‍ അദ്ദേഹം മരിച്ചു കാണും എന്ന ധാരണയില്‍ ദുഖത്തോടെ മിഷന്‍ ഉപേക്ഷിച്ച് ടീം അംഗങ്ങള്‍ ഭൂമിയിലേക്കു തിരിച്ചു യാത്ര തുടങ്ങുന്നു.
.
എന്നാല്‍ മാര്‍ക്ക് വാട്ട്നി മരിച്ചിരുന്നില്ല. സ്യൂട്ടിന്റെ ആന്റിന ദേഹത്ത് തുളഞ്ഞു കയറുകയും സാരമായി പരിക്കേല്‍ക്കുകയും ചെയ്തെങ്കിലും സ്യൂട്ടിലെ ദ്വാരത്തില്‍ രക്തം കട്ടപിടിച്ചതിനാല്‍ ഓക്സിജന്‍ അളവ് കുറയാതെ ബാക്കിയുള്ളതിനാലും അദ്ദേഹം രക്ഷപ്പെട്ടു. ബോധം വീണ്ടെടുത്ത മാര്‍ക്കിന് താന്‍ ചൊവ്വാ ഗ്രഹത്തില്‍ ഒറ്റപ്പെട്ടെന്ന് മനസ്സിലായി. ഇവിടെ നിന്ന് രക്ഷപ്പെടാന്‍ ഏക മാര്‍ഗ്ഗം അടുത്ത ചൊവ്വാ ദൗത്യമായ Ares IVലെ അംഗങ്ങള്‍ ചൊവ്വയിലെത്തുകയാണ്. പക്ഷേ അതിനായി നാലു വര്‍ഷം കാത്തിരിക്കണം. മിഷന്‍ ഹാബ് പരിശോധിച്ച മാര്‍ക്ക് അടുത്ത 300 സോളുകള്‍ (Martian solar day, or "sol", is 24 hours, 39 minutes, and 35.244 seconds) കഴിഞ്ഞു കൂടാനുള്ള ഭക്ഷണം മാത്രമേ അവശേഷിക്കുന്നുള്ളൂ എന്ന് മനസ്സിലാക്കി. കൃഷി ചെയ്ത് ഭക്ഷണം ഉണ്ടാക്കാത്തിടത്തോളം അടുത്ത മിഷന്‍ വരേക്കും തള്ളി നീക്കാനാവില്ല. ചൊവ്വയിലെ മണ്ണ് ഹാബിനുള്ളില്‍ കൊണ്ടു വന്ന് മിഷന്‍ അംഗങ്ങളുടെ മനുഷ്യ വിസര്‍ജ്യം വളമാക്കി ഉപയോഗിച്ച് കുറച്ച് ഉരുളക്കിഴങ്ങുകള്‍ കൃഷി ചെയ്യാന്‍ തീരുമാനിക്കുന്നു. പക്ഷേ വെള്ളം പ്രശ്നമാണ്. റോക്കറ്റ് ഫ്യൂവല്‍ സിലിണ്ടറിലെ ഹൈഡ്രജന്‍ ഓക്സിഡൈസ് ചെയ്ത് ജലം ഉദ്പാദിപ്പിക്കുന്നു. അതോടൊപ്പം Ares IV ഇറങ്ങുന്ന പ്രദേശത്തേക്ക് സഞ്ചരിക്കാനുള്ള റോവറിന്റെ നിര്‍മ്മാണവും ആരംഭിക്കുന്നു.
.
അതേസമയം ഭൂമിയില്‍ നാസയുടെ ചൊവ്വാ ദൗത്യത്തിന്റെ ഡയറക്ടര്‍ വിന്‍സന്റ് കപൂറിന്റെ (Chiwetel Ejiofor) നേതൃത്വത്തിലുള്ള സംഘം ഉപഗ്രഹ ചിത്രങ്ങള്‍ പരിശോധിക്കുന്നതിനിടയില്‍  Ares III സൈറ്റില്‍ സോളാര്‍ പാനലുകളുടെ സ്ഥാനമാറ്റം ശ്രദ്ധിക്കുന്നു. മാര്‍ക്ക് ജീവിച്ചിരിപ്പുണ്ടോ എന്ന സംശയം ഉടലെടുക്കുന്നു. തുടര്‍ന്ന് മാര്‍ക്കുമായി ബന്ധപ്പെടാന്‍ ശ്രമിക്കുന്നു. അതേസമയം ചൊവ്വയില്‍ നിന്ന് ഭൂമിയിലേക്ക് ബന്ധപ്പെടാന്‍ മാര്‍ഗ്ഗം തേടുന്ന മാര്‍ക്ക് 1997 ല്‍ മണലില്‍ പൂണ്ടു പോയി പ്രവര്‍ത്തനം നിലച്ച നാസയുടെ പാത്ത്ഫൈന്‍ഡര്‍ (Mars Pathfinder / MESUR Pathfinder) റോവര്‍ വീണ്ടെടുക്കുന്നു. ഇതിലെ തിരിയുന്ന ക്യാമറ ഉപയോഗിച്ച് ഭൂമിയിലേക്ക് സന്ദേശമയക്കുന്നു. മാര്‍ക്ക് ജീവിച്ചിരിക്കുന്നുണ്ടെന്ന് ഉറപ്പിച്ച നാസ അദ്ദേഹത്തെ എത്രയും വേഗം തിരികെ കൊണ്ടു വരാനായി ശ്രമമാരംഭിക്കുന്നു. പാത്ത്ഫൈന്‍ഡറും മാര്‍ക്കിന്റെ റോവറും തമ്മില്‍ ബന്ധപ്പെടുത്തി പ്രോഗ്രാമില്‍ മാറ്റങ്ങള്‍ വരുത്തി ടൈപ്പ് ചെയ്ത് പരസ്പരം വിവരങ്ങള്‍ അയക്കുന്ന സംവിധാനം സജ്ജീകരിക്കാനായി.
.
ഭൂമിയിലേക്കു തിരിച്ചു യാത്ര നടത്തുന്ന മറ്റ് മിഷന്‍ അംഗങ്ങളെ മാര്‍ക്ക് വാട്നി ജീവിച്ചിരിപ്പുണ്ടെന്ന വിവരം നാസ ഡയറക്ടര്‍ക്ക് അറിയിക്കേണ്ടി വരുന്നു. മെല്ലിസ ലൂയിസിന്റെ (Jessica Chastain) നേതൃത്വത്തിലുള്ള ടീം ചൊവ്വയിലേക്ക് തിരിച്ച് പോകുന്നതും നാസയും ചൈനായുടെ ബഹിരാകാശ ഏജന്‍സിയും (CNSA - China National Space Administration) ഒത്തൊരുമയുള്ള പ്രവര്‍ത്തനത്തിലൂടെ മാര്‍ക്കിനെ രക്ഷപ്പെടുത്തുന്നതുമാണ് തുടര്‍ന്നുള്ള കഥ.
.
Harry Gregson-Williams ന്റെ സംഗീതം സന്ദര്‍ഭങ്ങളെ മനോഹരമാക്കിയിട്ടുണ്ട്. മെല്ലിസ ലൂയിസിന്റെ കളക്ഷനിലുള്ള നിരവധി ഡിസ്കോ സിഡികള്‍ മാര്‍ക്ക് ഒഴിവു സമയങ്ങളിലും യാത്രകളിലും കേള്‍ക്കുന്നുണ്ട്. 1970 കളിലെ "Turn the Beat Around", "Hot Stuff" തുടങ്ങിയ ഹിറ്റുകള്‍ അവയില്‍പ്പെടുന്നു. 2015 സപ്തംബര്‍ 19 ന് ഈ സിനിമയുടെ പ്രദര്‍ശനം ഇന്റര്‍നാഷനല്‍ സ്പേസ് സ്റ്റേഷനില്‍ വച്ച് നടത്തുകയുണ്ടായി.
.
സ്പേസ് യാത്രകളില്‍ മനുഷ്യശരീരത്തിനുണ്ടാകുന്ന മാറ്റങ്ങളെ സംബന്ധിച്ച് (Effect of spaceflight on the human body) ശാസ്ത്രീയമായ ധാരണകള്‍ ഈ സിനിമയില്‍ പുലര്‍ത്തുന്നുണ്ടോ എന്ന് എനിക്ക് സംശയം തോന്നി. എന്നിരുന്നാലും ഗ്രാവിറ്റിയും ഇന്റര്‍സ്റ്റെല്ലാറും പകര്‍ന്നു തന്ന സയന്‍സ് ഫിക്ഷന്‍ അനുഭവം മാര്‍ട്ടിയനും നല്‍കും തീര്‍ച്ച. മനുഷ്യന്‍ ചന്ദ്രനിലിറങ്ങുന്നതിനു മുമ്പ് ഇറങ്ങിയ ശാസ്ത്ര കല്‍പ്പിത സിനിമയായിരുന്നല്ലോ 2001: A Space Odyssey (1968). അതിനും മുമ്പും ശേഷവും ഉള്ള സയന്‍സ് ഫിക്ഷന്‍ കഥകളും സിനിമകളും പലതും ഇതിനോടകം തന്നെ യാഥാര്‍ത്ഥ്യമായിക്കഴിഞ്ഞു.  ശാസ്ത്രവളര്‍ച്ചയെ പിന്നോട്ടു വലിക്കുന്ന കാലഹരണപ്പെട്ട ആശയങ്ങളുമായി ഇന്നും നടക്കുന്നവരും എല്ലാത്തിനേയും തരണം ചെയ്ത് ശാസ്ത്രം മുന്നേറും എന്ന് വിശ്വസിക്കുന്ന ശാസ്ത്രകുതുകികളും തീര്‍ച്ചയായും കണ്ടിരിക്കേണ്ട സിനിമയാണ് മാര്‍ട്ടിയന്‍. ആശയങ്ങള്‍ ജനിക്കുന്നതിനും തിരുത്തിയെഴുതപ്പെടുന്നതിനും അത് ആവശ്യമാണ്, എന്നാലേ നാം ഈ നൂറ്റാണ്ടില്‍ ജീവിക്കുന്നവരാകൂ....
.
(ചിത്രം കടപ്പാട് - വിക്കിമീഡിയ, റഫറന്‍സ് - ഇംഗ്ലീഷ് വിക്കിപീഡിയ)

************************
ബ്രിജേഷ് പൂക്കോട്ടൂര്‍
************************

ചൊവ്വയില്‍ ജീവജലം

ചൊവ്വയില്‍ ജീവജലം

വാഷിങ്ടണ്‍:- ചൊവ്വാഗ്രഹത്തില്‍ ജല സാന്നിധ്യം നാസ സ്ഥിരീകരിച്ചു. അതിനിര്‍ണായകമായ ഈ കണ്ടെത്തലോടെ, ചൊവ്വയില്‍ ജീവന്റെ സാന്നിധ്യത്തിനുള്ള സാധ്യതയേറി. നാസയുടെ ചൊവ്വ പര്യവേക്ഷണ വാഹനമായ ഓര്‍ബിറ്റര്‍ പകര്‍ത്തിയ ചിത്രങ്ങള്‍ അപഗ്രഥിച്ചാണ് ജലസാന്നിധ്യം സ്ഥിരീകരിച്ചത്. ചൊവ്വയുടെ വരണ്ട കുന്നിന്‍ചെരിവുകളിലൂടെ ലവണാംശമുള്ള ജലം ഊറി ഒഴുകിയതിന്റെ അടയാളങ്ങള്‍ ചിത്രങ്ങളില്‍ വ്യക്തമാകുന്നതായി ഗവേഷകര്‍ അറിയിച്ചു. തിങ്കളാഴ്ച വാര്‍ത്താസമ്മേളനം വിളിച്ചാണ് ശാസ്ത്രത്തിനു വന്‍ കുതിപ്പാകുന്ന കണ്ടെത്തല്‍ നാസ പുറത്തുവിട്ടത്.

വിടവുകളിലൂടെ ഒലിച്ചിറങ്ങിയ ഈ ദ്രാവകത്തിന് ലവണസ്വഭാവമാണ്. ജലപ്രവാഹത്തിന്റെ ഉറവിടം സ്ഥിരീകരിച്ചിട്ടില്ല. ചൊവ്വയുടെ ഉപരിതലത്തിന് അടിയില്‍ ബാഷ്പീകരിക്കപ്പെട്ട അവസ്ഥയിലോ ശീതീകരിക്കപ്പെട്ട് ഖരരൂപത്തിലോ ജലം ഉണ്ടാകാമെന്നാണ് നിഗമനം. ഉപരിതലത്തിനടിയില്‍ ഉപ്പുജലം ദ്രവ-വാതകരൂപത്തില്‍ സംഭരിക്കപ്പെട്ടിരിക്കാം. വെള്ളത്തെ ഉള്‍ക്കൊള്ളാനും അതിന് ചലിക്കാനും ഇടം നല്‍കുന്ന പാറക്കെട്ടുകള്‍ ഒരുപക്ഷേ ചൊവ്വയുടെ അന്തര്‍ഭാഗത്ത് ഉണ്ടാകാനും സാധ്യതയുണ്ട്. ചൊവ്വയുടെ ഇരുണ്ട മേഖലയുടെ ദൃശ്യം ഓര്‍ബിറ്ററിന് പകര്‍ത്താനായതാണ് ഗവേഷണത്തില്‍ വഴിത്തിരിവുണ്ടാക്കിയത്. ലവണാംശം ഇല്ലെങ്കില്‍ ചൊവ്വയിലെ കൊടുംതണുപ്പില്‍ ജലം തണുത്തുറഞ്ഞ് ഖരരൂപത്തില്‍ മാത്രമേ നിലനില്‍ക്കൂ. ലവണാംശം ഉള്ളതിനാല്‍ ദ്രവരൂപത്തില്‍ത്തന്നെ ജലം സംഭരിക്കപ്പെട്ടിരിക്കാന്‍ സാധ്യതയുണ്ട്. "ജലസാന്നിധ്യം സ്ഥിരീകരിക്കപ്പെട്ടതിനാല്‍ വാസയോഗ്യമായ പരിസ്ഥിതിയും അവിടെയുണ്ടാകുമെന്ന്' നാസയുടെ ചൊവ്വപര്യവേക്ഷണ പദ്ധതി മേധാവി മൈക്കല്‍ മേയേര്‍ പറഞ്ഞു. ഭൂമിക്കുപുറത്ത് ജലം തേടിയുള്ള ദശകങ്ങള്‍ നീണ്ട ബഹിരാകാശപരിശ്രമത്തിനാണ് ഇപ്പോള്‍ ഉത്തരം ലഭിച്ചത്. ചൊവ്വയില്‍ ജലം കണ്ടെത്തുന്നത് മനുഷ്യന്റെ ഗോളാന്തര സഞ്ചാരപദ്ധതികള്‍ക്ക് ഊര്‍ജ്ജംപകരും.

ചൊവ്വയില്‍ വരണ്ട നദികളുടെ സാന്നിധ്യമുള്ളതായി മുമ്പും നാസ സൂചനകള്‍ പുറത്തുവിട്ടിരുന്നു. ചൊവ്വയിലെ ജലത്തിന്റെ ഉറവിടത്തെക്കുറിച്ചാകും ഇനി ശാസ്ത്രലോകത്തിന്റെ അന്വേഷണം. ചൊവ്വയില്‍ ജലം സംഭരിക്കപ്പെട്ടിരിക്കാനുള്ള സാധ്യതയെ കുറിച്ചുള്ള മൂന്ന് പഠനങ്ങളും നാസ പുറത്തുവിട്ടു. ചൊവ്വയിലെ വരയന്‍ പ്രതലം ജലം ഒഴുകിയതിന്റെ തെളിവാണെന്ന് 2011ല്‍ അരിസോണ സര്‍വകലാശാലയിലെ ഗവേഷകനും പ്രമുഖ ശാസ്ത്രഗ്രന്ഥകര്‍ത്താവുമായ ലുജേന്ദ്ര ഓജയാണ് ആദ്യമായി ചൂണ്ടിക്കാട്ടിയത്. ഇന്ത്യയുടെ ചൊവ്വാ പേടകമായ മംഗള്‍യാനും ചൊവ്വയില്‍ ജലസാന്നിധ്യം സൂചിപ്പിക്കുന്ന ചിത്രങ്ങള്‍ നേരത്തെ അയച്ചിരുന്നു. ചൊവ്വയുടെ ഒരു പകുതി പൂര്‍ണമായും സമുദ്രമായിരുന്നുവെന്നും പിന്നീട്, ഇത് ഇല്ലാതാവുകയായിരുന്നുവെന്നും നാസ മുമ്പ് വെളിപ്പെടുത്തിയിരുന്നു.

- See more at: http://www.deshabhimani.com/news-international-all-latest_news-504251.html#sthash.YASjHRA6.dpuf

ഇന്ത്യയുടെ ചൊവ്വാ ദൗത്യം

ചരിത്രം ഈ ചൊവ്വാ ദൗത്യം

റിപ്പോര്‍ട്ട് കടപ്പാട്  : ഡോ. എ രാജഗോപാല്‍ കമ്മത്ത്, ദേശാഭിമാനി കിളിവാതില്‍

മംഗള്‍യാന്‍ അഥവാ മാഴ്സ് ഓര്‍ബിറ്റര്‍ മിഷന്‍ എന്ന ഇന്ത്യന്‍ ചൊവ്വാ പര്യവേക്ഷണ ദൗത്യം പ്രധാനമായും ബഹിരാകാശ സാങ്കേതികതയുടെ വിപുലീകരണം ലക്ഷ്യമാക്കി രൂപീകരിച്ചതാണ്. അതിനാല്‍തന്നെ ചൊവ്വയുടെ ഭ്രമണപഥത്തില്‍ ഇത് എത്തിയാല്‍ത്തന്നെ വിജയം എന്നാണ് ശാസ്ത്രജ്ഞര്‍ അവകാശപ്പെട്ടത്. കഴിഞ്ഞ 51 ദൗത്യങ്ങളില്‍ 21 എണ്ണം മാത്രമാണ് വിജയിച്ചിട്ടുള്ളത്. മൂന്നെണ്ണം ഭാഗികമായി വിജയമായിരുന്നു. മൂന്നു രാജ്യങ്ങളുടെ ബഹിരാകാശ ഏജന്‍സികളാണ് ഇതില്‍ വിജയം കൈവരിച്ചത്. നാസ, റഷ്യന്‍ സ്പേസ് ഏജന്‍സി, യൂറോപ്യന്‍ സ്പേസ് ഏജന്‍സി എന്നിവയാണവ. ജപ്പാനും ചൈനയും ദൗത്യങ്ങളയക്കാന്‍ ശ്രമിച്ചെങ്കിലും പരാജയം രുചിച്ചു.

780 ദിവസം കൂടുമ്പോള്‍ മാത്രം ഉണ്ടാകുന്ന വിന്‍ഡോ ഓഫ് ഓപ്പര്‍ച്യൂണിറ്റി എന്ന അവസരമാണ് ഏറ്റവും കുറഞ്ഞ ഇന്ധനച്ചെലവില്‍ ദൗത്യത്തെ ചൊവ്വയുടെ ഭ്രമണപഥത്തില്‍ എത്തിക്കാന്‍ സാധിക്കുന്നത്. ഇത്തവണ നവംബറിലാണ് അനുയോജ്യമായ ദിവസങ്ങള്‍. ഇന്ത്യയുടെ ദൗത്യത്തിനു സമാനമായ ലക്ഷ്യങ്ങളുള്ള മാവേന്‍ ദൗത്യം നാസ ചൊവ്വയിലേക്ക് അയക്കുന്നുണ്ട്. നമ്മുടേത് ആദ്യ ദൗത്യമായതുതന്നെ ഐഎസ്ആര്‍ഒയിലെ ശാസ്ത്രസമൂഹത്തിന്റെ വിജയമാണ്. മുന്‍നിര സ്പേസ് ഏജന്‍സിയായ നാസ നമ്മെ പിന്തുടരുന്നു എന്നു പറയാം.

അത്യധികം സങ്കീര്‍ണമാണ് ഭൂമിയില്‍നിന്ന് കുറഞ്ഞ ഇന്ധനച്ചെലവില്‍ ചൊവ്വയിലേക്കുള്ള പ്രക്ഷേപപഥത്തിലെത്താന്‍ സഹായകമാകുന്ന ആര്‍ഗ്യുമെന്റ് ഓഫ് പെരിജീ എന്ന ദൗത്യത്തിന്റെ വിന്യാസത്തിലെ മാറ്റം. മുമ്പത്തെ ദൗത്യങ്ങള്‍ വെറും 178 ഡിഗ്രി മാത്രം ഈ രീതിയില്‍ വിന്യസിക്കപ്പെട്ടെങ്കില്‍ ഇന്ത്യയുടെ ചൊവ്വാദൗത്യത്തിന്റേത് 276.4 മുതല്‍ 288.6 ഡിഗ്രി വരെയാണ്. സാധാരണ 1200 സെക്കന്‍ഡ് മാത്രം പറക്കല്‍ സമയമുള്ള പിഎസ്എല്‍വി 2657 സെക്കന്‍ഡാണ് കുതിക്കുക. റോക്കറ്റിന്റെ നാലാംഘട്ടം പ്രവര്‍ത്തിക്കുന്നതിനുമുമ്പ് 1500-1800 സെക്കന്‍ഡ് കാലതാമസമെടുത്ത് പിന്നീട് റോക്കറ്റ് എന്‍ജിന്‍ പ്രവര്‍ത്തിപ്പിക്കുന്നു. ചൊവ്വാദൗത്യത്തിനായുള്ള ഭ്രമണപഥത്തിലെത്തിക്കാനാണ് ഇത്. 366 ഃ 80,000 കി.മീ വരുന്ന ചൊവ്വയുടെ ഭ്രമണപഥത്തില്‍ എത്തിച്ച് പഠനം നടത്തുകയാണ് ലക്ഷ്യം. ആദ്യം ഭൂമിയുടെ ഭ്രമണപഥത്തില്‍ എത്തിച്ചശേഷം യാനത്തെ അഞ്ചുഘട്ടങ്ങളായി ഏകദേശം 1,95,000 കി.മീ ഉയരത്തിലുള്ള ഭ്രമണപഥത്തിലെത്തിക്കുകയാണു പരിപാടി. പിന്നീട് ചൊവ്വയിലേക്കുള്ള പ്രയാണത്തിനു തുടക്കമിടുകയും ലക്ഷ്യമാണ്.

മൂന്നു പ്രധാനപ്പെട്ട പഠനങ്ങളാണ് മാഴ്സ് ഓര്‍ബിറ്റര്‍ മിഷനിലൂടെ ഇന്ത്യ ഉദ്ദേശിക്കുന്നത്. അന്തരീക്ഷം, അന്തരീക്ഷത്തിലും ബാഹ്യാന്തരീക്ഷത്തിലുമുള്ള കണങ്ങളുടെ അപഗ്രഥനം, ഉപരിതലത്തിന്റെ ഇമേജിങ് എന്നിവയാണവ. ഇതിനായി അഞ്ച് പഠന ഉപകരണങ്ങള്‍ ഇതില്‍ സജ്ജമാക്കി. ലൈമാന്‍ ആല്‍ഫാ ഫോട്ടോമീറ്റര്‍ ഡ്യൂട്ടീരിയത്തിന്റെയും ഹൈഡ്രജന്റെയും ആപേക്ഷിക അനുപാതം നിരീക്ഷിക്കും. ഇതുവഴി ജലം എങ്ങനെ സ്പേസിലേക്കു കടക്കും എന്നറിയാനാകും. മീഥേന്‍ സെന്‍സര്‍ ഫോര്‍ മാഴ്സ് എന്ന ഉപകരണം ചൊവ്വയിലെ മീഥേന്‍ വാതകത്തിന്റെ സാന്നിധ്യവും അതിന്റെ സ്രോതസ്സുകളും പഠനവിധേയമാക്കും. ഇതുവഴി കഴിഞ്ഞകാലത്ത് ചൊവ്വയില്‍ മൈക്രോബുകള്‍ ഉണ്ടായിരുന്നതിനെക്കുറിച്ചുള്ള വിവരം ലഭിക്കും. മെഥനോജന്‍ എന്ന സൂക്ഷ്മജീവികളാണ് മീഥേന്‍ പുറപ്പെടുവിക്കുക. മാഴ്സ് എക്സോസ്ഫെറിക് ന്യൂട്രല്‍ കോമ്പോസിറ്റ് അനലൈസര്‍ ചൊവ്വയുടെ എക്സോസ്ഫിയറിലുള്ള കണങ്ങളുടെ ഘടനയുടെ അപഗ്രഥനം നടത്തും. തെര്‍മല്‍ ഇമേജിങ് സ്പെക്ട്രോമീറ്റര്‍ താപനിലയും ഉത്സര്‍ജകതയും നിരീക്ഷിക്കും. ഇതുവഴി ചൊവ്വയുടെ ഉപരിതലത്തിന്റെ ഘടന, അതിലെ ധാതുലവണങ്ങളുടെ സാന്നിധ്യം എന്നിവ അറിയാനാകും.

മാഴ്സ് കളര്‍ ക്യാമറാ ചൊവ്വയുടെ ഉപരിതലത്തിന്റെ ചിത്രങ്ങള്‍ പകര്‍ത്തും. ഇതുവഴി മറ്റ് ഉപകരണങ്ങള്‍ക്കായുള്ള വിവരങ്ങളും നല്‍കും. ചൊവ്വയുടെ ഉപഗ്രഹങ്ങളായ ഫോബോസ്, ഡെയിമോസ് എന്നിവയുടെ നിരീക്ഷണവും നടത്തും. ഭൂമിയുടെ ഭ്രമണപഥത്തില്‍നിന്ന് 300 ദിവസമെടുത്ത്് യാനം ചൊവ്വയുടെ ഭ്രമണപഥത്തില്‍ എത്തിക്കാനാണ് ലക്ഷ്യമിടുന്നത്. 40 കോടി കി.മീ ദൂരത്തുള്ള ഈ ഗ്രഹത്തിലേക്കുള്ള പ്രയാണം അതിസങ്കീര്‍ണംതന്നെ. ഭൂമിയുടെ ഭ്രമണപഥത്തില്‍നിന്ന് ചൊവ്വയിലേക്കുള്ള പ്രക്ഷേപപഥത്തിലേക്ക് ചെലുത്തുന്നത് കൃത്യമായിത്തന്നെ നടത്തേണ്ടതുണ്ട്. അല്ലെങ്കില്‍ യാനം എന്നേയ്ക്കുമായി സൂര്യന്റെ ചുറ്റിനുമുള്ള ഭ്രമണപഥത്തില്‍ അകപ്പെടും. ഭൂമിയുടെ 60,000 കി.മീ അകലത്തിലുള്ള വാന്‍ അലന്‍ റേഡിയേഷന്‍ ബെല്‍റ്റ് എന്ന, സൂര്യനില്‍നിന്ന് മറ്റു പ്രാപഞ്ചിക സ്രോതസ്സുകളില്‍നിന്നുള്ള കണങ്ങളെ തടഞ്ഞ് ഭൂമിയെ സംരക്ഷിക്കുന്ന പ്രദേശം കടക്കുക എന്നത് ഏറെ ദുഷ്കരമാണ്. ചാന്ദ്രയാന്‍ വിജയകരമായി ഇതു കടന്നിരുന്നു. ഈ പ്രദേശം കഴിഞ്ഞാല്‍ ഉണ്ടാകുന്ന വികിരണത്തള്ളല്‍ ആശങ്ക ഉളവാക്കുന്നതാണ്. അതുപോലെ 10 മാസം കഴിഞ്ഞാണ് യാനത്തിലെ എന്‍ജിനുകള്‍ ചൊവ്വയുടെ ഭ്രമണപഥത്തിലേക്കിറങ്ങാന്‍ വീണ്ടും പ്രവര്‍ത്തിപ്പിച്ചുതുടങ്ങാന്‍ ലക്ഷ്യമിടുന്നത്.

300 ദിവസത്തെ പ്രയാണത്തിനിടയില്‍ വളരെയധികം തീവ്രമായ താപനിലയിലെ കുറവും മറ്റും യാനത്തിനു നേരിടേണ്ടിവരും. അതു മാത്രമല്ല, ഭൂമിയില്‍ ലഭിക്കുന്നതിന്റെ 47 ശതമാനം മാത്രമാണ് ചൊവ്വയില്‍ ലഭിക്കുന്ന സൂര്യന്റെ വികിരണം. അതിനാല്‍ യാനത്തില്‍ ഊര്‍ജം നല്‍കുന്ന സൗരോര്‍ജ്ജ പാനലുകള്‍ ഏതു രീതിയില്‍ പ്രവര്‍ത്തിക്കുമെന്ന് കണ്ടറിയുകതന്നെ. ദൂരം കൂടുതലായതിനാല്‍ തത്സമയം യാനത്തിന് ഭൂമിയിലിരുന്ന് നിര്‍ദേശങ്ങള്‍ നല്‍കാനാകില്ല. ഭൂമിയില്‍ നിരീക്ഷണകേന്ദ്രത്തില്‍നിന്നു നല്‍കുന്ന നിര്‍ദേശങ്ങള്‍ 20 മിനിറ്റ് കഴിഞ്ഞാണ് യാനത്തിലെത്തുക. അതുപോലെ തിരിച്ചുള്ള സിഗ്നലിനും ഇത്രയും സമയമെടുക്കുന്നു. അതിനാല്‍ കുഴപ്പങ്ങള്‍ പരിഹരിക്കാന്‍ സ്വയം തീരുമാനമെടുക്കുന്നതരം പ്രോഗ്രാമുകള്‍ യാനത്തില്‍ സജ്ജമാക്കി.

പസഫിക്കില്‍ നിരീക്ഷണ സംവിധാനവുമായി രണ്ടു കപ്പലുകള്‍ സജ്ജമാക്കിയിരിക്കുന്നു. ഇന്ത്യന്‍ ഡീപ് സ്പേസ് നെറ്റ്വര്‍ക്കിന്റെയും നാസയുടെ ജെറ്റ് പ്രൊപ്പല്‍ഷന്‍ ലബോറട്ടറിയുടെയും നിരീക്ഷണം യാനത്തിന്റെ ഗതി നിര്‍ദേശിച്ച ദിശയില്‍ത്തന്നെ എന്ന് ഉറപ്പുവരുത്തുന്നു. ചൊവ്വയും ഭൂമിയും ഒരേ ഭ്രമണതലത്തിലൂടെയാണ് സൂര്യനെ ചുറ്റുന്നത്. അവയുടെ കറക്കവും ഒരേ ദിശയില്‍തന്നെ. അതിനാല്‍ ഓരോ 26 മാസം കൂടുമ്പോഴും ഇവയ്ക്കിടയില്‍ യാനത്തെ അയക്കാനായുള്ള ഏറ്റവും നല്ല പ്രക്ഷേപപഥം ലഭിക്കും. നാസ ഇപ്പോഴുള്ള ദിശയിലേക്കല്ല യാനത്തെ അയക്കുന്നത്. 10 മാസം കഴിഞ്ഞ് അതുണ്ടാകുന്ന ഇടത്തേക്കാണ് ഇതു പ്രയാണം ചെയ്യുന്നത്. ചൊവ്വയിലേക്കുള്ള പ്രയാണത്തെ മൂന്നായി തരംതിരിച്ചിരിക്കുന്നു.

ഭൂമിയുടെ സ്വാധീനത്തിലുള്ള ജിയോസെന്‍ട്രിക് ഫേസ്, സൂര്യന്റെ സ്വാധീനത്തിലുള്ള ഹീലിയോ സെന്‍ട്രിക് ഫേസ്, ചൊവ്വയുടെ സ്വാധീനത്തിലുള്ള മാഴ്സിയന്‍ ഫേസ് എന്നിവ. ആദ്യം യാനം ദീര്‍ഘവൃത്താകൃതിയിലുള്ള പാര്‍ക്കിങ് ഓര്‍ബിറ്റില്‍ എത്തിക്കാനാണ് പദ്ധതി. ഇതിനുശേഷം അഞ്ചുതവണയായി ഭ്രമണപഥം ഉയര്‍ത്തും. ട്രാന്‍സ്മാഴ്സ് ഇഞ്ചക്ഷന്‍ മനൂവര്‍ എന്ന പ്രവര്‍ത്തനമാണ് പിന്നീട്. മാഴ്സ് ട്രാന്‍സ്ഫര്‍ ട്രാജക്റ്ററി എന്ന ചൊവ്വയിലേക്കുള്ള പ്രക്ഷേപപഥത്തിലേക്കാണ് യാനത്തെ എത്തിക്കുന്നത്. അടുത്തതായി ഹൈപര്‍ബോളിക് ഡിപാര്‍ച്ചര്‍ ട്രാജക്റ്ററി എന്ന പ്രക്ഷേപപഥത്തില്‍ യാനത്തെ തൊടുക്കുന്നു. പിന്നീട് യാനം ഭൂമിയുടെ സ്വാധീനമണ്ഡലത്തില്‍നിന്നു മുക്തമാകുന്നു. ഈ വേളയില്‍ ഭൂമിയില്‍നിന്നുള്ള വിടുതല്‍ പ്രവേഗമായ 11.2 കി.മീ/സെ കടന്നുള്ള വേഗമാകും യാനത്തിന്. ഇതിനുശേഷം ദീര്‍ഘവൃത്താകൃതിയിലുള്ള ഗ്രഹാന്തര പ്രക്ഷേപപഥത്തില്‍ യാനമെത്തും. 300 ദിവസം കഴഞ്ഞ് യാനം ചൊവ്വയുടെ സമീപത്തെത്തും. അപ്പോഴാണ് എന്‍ജിന്‍ വീണ്ടും പ്രവര്‍ത്തിപ്പിച്ചുതുടങ്ങുക. പിന്നീടിതിനെ ചൊവ്വയ്ക്കു ചുറ്റുമുള്ള ഭ്രമണപഥത്തില്‍ എത്തിക്കും. തുടര്‍ന്ന് പേലോഡിലെ ഉപകരണങ്ങളിലൂടെ ചൊവ്വയുടെ വിവരങ്ങള്‍ ശേഖരിച്ച് ഭൂമിയിലേക്ക് റിലേ ചെയ്യും.

ഏതാണ്ട് ആറുമാസത്തോളം യാനം ചൊവ്വയുടെ ഭ്രമണപഥത്തിലുണ്ടാകും. അതിനുശേഷം അത് ദൗത്യം അവസാനിപ്പിച്ച് ചൊവ്വയിലേക്കു പതിക്കും. 2014 ഒക്ടോബറില്‍ ഒരു വാല്‍നക്ഷത്രം ചൊവ്വയില്‍ പതിക്കാനിടയുണ്ടെന്ന വിവരം ആശങ്കയ്ക്ക് ഇടനല്‍കുന്നു. കൊമെറ്റ് 2013എ1 എന്ന വാല്‍ നക്ഷത്രമാണ് ഈ ആശങ്കയ്ക്കു പിന്നില്‍. സെക്കന്‍ഡില്‍ 56 കി.മീ. വേഗത്തിലാണ് ഈ വാല്‍നക്ഷത്രം ചലിക്കുന്നത്. ചൊവ്വയില്‍ ഇതു പതിച്ചാല്‍ 35 മില്യന്‍ മെഗാ ടണ്‍ ടിഎന്‍ടി സ്ഫോടനത്തിനു തുല്യമായ ആഘാതം ചൊവ്വയിലുണ്ടാകും. ഈ പതനം നടന്നാല്‍ എല്ലാ പര്യവേക്ഷണ യാനങ്ങളും ഉപയോഗശൂന്യമാകും.

ചൊവ്വയില്‍ അന്വേഷിക്കുന്നത്

റിപ്പോര്‍ട്ട് കടപ്പാട്  : എന്‍ എസ് അരുണ്‍കുമാര്‍, ദേശാഭിമാനി കിളിവാതില്‍

ചൊവ്വയിലേക്കുള്ള ബഹിരാകാശദൗത്യങ്ങളില്‍ പ്രസക്തമാവുന്നത് ഒരേയൊരു ചോദ്യമാണ്. ചൊവ്വയില്‍ ജീവന്‍ നിലനില്‍ക്കുന്നുണ്ടോ? ഈ ചോദ്യത്തിന്റെ ഏറ്റവും വലിയ പ്രത്യേകതകളിലൊന്ന ഇതിന്റെ പഴക്കമാണ്. ശാസ്ത്രലോകം ഈ ചോദ്യം ചോദിച്ചുതുടങ്ങിയിട്ട് 40 വര്‍ഷമെങ്കിലും കഴിഞ്ഞിട്ടുണ്ട്. ചൊവ്വയുടെ ഉപരിതലത്തെ ആദ്യമായി സ്പര്‍ശിക്കുന്ന മനുഷ്യനിര്‍മിത വാഹനം സോവിയറ്റ് യൂണിയന്റെ "മാര്‍സ്- 3" ആയിരുന്നുവെങ്കിലും, ചൊവ്വയുടെ വിശേഷങ്ങളെ വിജയകരമായി ഭൂമിയിലേക്കയച്ചത്, അമേരിക്കയുടെ "മാരിനര്‍- 9" ആയിരുന്നു. ചൊവ്വയെ ചുറ്റിയുള്ള ഭ്രമണപഥത്തില്‍ ആദ്യമായി സ്വയം അവരോധിക്കപ്പെടുന്ന ഉപഗ്രഹവും "മാരിനര്‍- 9" ആയിരുന്നു.


1973ലായിരുന്നു ഇത്. അങ്ങനെ നോക്കിയാല്‍, ചൊവ്വാ പര്യവേക്ഷണത്തിന്റെ 40-ാം വാര്‍ഷികത്തിലാണ്, "മാര്‍സ് ഓര്‍ബിറ്റര്‍ മിഷന്‍" എന്ന ഔദ്യോഗിക നാമമുള്ള "മംഗള്‍യാന്‍" അവിടേക്കെത്താന്‍ ശ്രമിക്കുന്നത്. എന്നാല്‍ ഇപ്പോഴും ഉത്തരം കണ്ടെത്താനാവാതെ അവശേഷിക്കുന്ന ചോദ്യം ചൊവ്വയില്‍ ജീവനുണ്ടോ, അല്ലെങ്കില്‍ ഉണ്ടായിരുന്നുവോ എന്നതാണ്. "മാരിനര്‍- 9" ചൊവ്വയുടെ അടുത്തെത്തിയപ്പോള്‍, അവിടെ ഒരു പൊടിക്കാറ്റ് വീശുകയായിരുന്നുവെന്ന് "നാസ"യുടെ രേഖകള്‍ പറയുന്നു.


ഉയര്‍ന്നുവന്നുകൊണ്ടിരുന്ന പൊടിപടലങ്ങള്‍ കാരണം, അതിനു താഴേയ്ക്കുള്ള ഒന്നും കാണാനാവാത്ത അവസ്ഥയായിരുന്നു അന്ന്. അതുകാരണം, ഒരാഴ്ചയോളം കഴിഞ്ഞ്, കാറ്റ് കെട്ടടങ്ങിയശേഷം മാത്രമായിരുന്നു "മാരിനറി"ന് ചൊവ്വയുടെ ഉപരിതലചിത്രം പകര്‍ത്താനായത്. പകര്‍ത്തിയപ്പോള്‍ അത് വലിയ വിഷയമായി. കാരണം, ചൊവ്വയില്‍ ജീവികളുണ്ടെന്നും, അവര്‍ക്ക് നാഗരികതയുണ്ടെന്നും അവര്‍ക്ക് കൃഷിയുണ്ടെന്നും ജലസേചനം നടത്താന്‍ അവര്‍ നിര്‍മിച്ച കനാലുകള്‍ ദൂരദര്‍ശിനിയിലൂടെ തനിക്കു കാണാമെന്നുമായിരുന്നു ഇറ്റാലിയന്‍ ജ്യോതിശാസ്ത്രജ്ഞനായ ഗിയോവാനി ഷിയാപറേലി പറഞ്ഞത്, 1977ല്‍. ഇത് സത്യമല്ലെന്ന്, "മാരിനര്‍- 9" പകര്‍ത്തി, ഭൂമിയിലേക്കയച്ച ഫോട്ടോഗ്രാഫുകള്‍ തെളിയിച്ചു. മനുഷ്യരെപ്പോലെ സംസ്കാരസമ്പന്നരായ, ബുദ്ധിയുള്ള ജീവികള്‍ ചൊവ്വയിലുണ്ടെന്ന വാദം അതോടെ അവസാനിച്ചു. എന്നാല്‍, അടുത്ത വിവാദം ഉടനെ തുടങ്ങി.


1976ല്‍, അമേരിക്കയുടെ "വൈക്കിങ്ങ്" എന്നു പേരായ പര്യവേക്ഷണദൗത്യം ചൊവ്വയിലിറങ്ങി. ഇറങ്ങുക മാത്രമല്ല, മണ്ണിളക്കി, അതില്‍നിന്ന് അല്‍പ്പം വാരി, രാസപരമായി പരീക്ഷിച്ചു. അതില്‍ ജീവന്റെ തുടിപ്പുകളുണ്ടെന്നായിരുന്നു അനൗദ്യോഗികമായ വെളിപ്പെടുത്തല്‍. പക്ഷേ, എന്തുകൊണ്ടോ അമേരിക്ക ആ റിപ്പോര്‍ട്ട് പൂഴ്ത്തി. ചൊവ്വയിലെ ജീവനെക്കുറിച്ചുള്ള ചിന്തകള്‍ പിന്നീട് പൊങ്ങിവന്നത്, യൂറോപ്യന്‍ സ്പേസ് ഏജന്‍സി ചൊവ്വയിലേക്ക് ഒരു പര്യവേക്ഷണദൗത്യത്തെ അയച്ചപ്പോഴായിരുന്നു. "മാര്‍സ് എക്സ്പ്രസ്" എന്നായിരുന്നു ഇതിന്റെ പേര്. ചൊവ്വയെ ചുറ്റിസഞ്ചരിച്ച് നിരീക്ഷണം നടത്തിയ ഇത്, 2003 ഡിസംബറില്‍, വളരെ സുപ്രധാനമായ വെളിപ്പെടുത്തല്‍ നടത്തി- "ജൈവസംയുക്തം" എന്നു വിശേഷിപ്പിക്കാവുന്ന ഒരെണ്ണത്തെ ചൊവ്വയുടെ അന്തരീക്ഷത്തില്‍ കണ്ടെത്തിയിരിക്കുന്നു- മീഥേന്‍ . അങ്ങനെയാണ് മീഥേന്‍വാതകം ചിത്രത്തിലേക്ക് കടന്നുവരുന്നത്.


മീഥേന്‍വാതകം ചൊവ്വയുടെ അന്തരീക്ഷത്തിലുണ്ടെങ്കില്‍, അതിനര്‍ഥം ജീവനുണ്ടെന്നാണ് ഒരുവിഭാഗം ശാസ്ത്രജ്ഞര്‍ വാദിച്ചു. കാരണം, ഭൂമിയില്‍, ഇത്തരത്തില്‍ മീഥേന്‍ ഉല്‍പ്പാദിപ്പിക്കുന്ന ചില സൂക്ഷ്മജീവികളുണ്ട്- "മെതനോജെന്‍സ്" എന്ന പേരില്‍. ബാക്ടീരിയകളായ ഇവ, ഉയര്‍ന്ന ലവണാംശത്തിലും താപനിലയിലുമൊക്കെ ജീവിക്കാന്‍ കഴിയുന്നവയാണ്. അതുകൊണ്ട് ഇവയുടെ പ്രതിനിധികള്‍ ചൊവ്വയിലുമുണ്ടാവാം എന്ന് ചിലര്‍ പ്രത്യാശ പ്രകടിപ്പിച്ചു. എന്നാല്‍, ഈ പ്രതീക്ഷ വിജയിക്കാന്‍ ഒരു പ്രധാന തടസ്സമുണ്ടായി എന്നതാണ് വസ്തുത. കാരണം, മീഥേന്‍ സൃഷ്ടിക്കാന്‍ സൂക്ഷ്മജീവികള്‍തന്നെ വേണമെന്നില്ല. തികച്ചും രാസപരമായ പ്രവര്‍ത്തനങ്ങള്‍മൂലവും മീഥേന്‍ സൃഷ്ടിക്കപ്പെടാം. ഭൂമിയില്‍ ഇങ്ങനെ നടക്കുന്നുണ്ട്. അങ്ങനെയെങ്കില്‍ ചൊവ്വയിലും അതുതന്നെയാവില്ലേ നടന്നുകൊണ്ടിരിക്കുന്നത്? ഇതിന് ഉത്തരം കണ്ടെത്തുന്നതായി പുതിയ പ്രശ്നം.


2003ലെ മീഥേന്‍ കണ്ടെത്തലിനുശേഷം, ഭൂമിയിലെ മൂന്നു ദൂരദര്‍ശിനികള്‍ ചൊവ്വയുടെ ഉപരിതലം തുടര്‍ച്ചയായ നിരീക്ഷണത്തിലൂടെ അരിച്ചുപെറുക്കാന്‍ ശ്രമിച്ചു. തുടര്‍ന്നുള്ള ഏഴു വര്‍ഷം അവ ഇതു തുടര്‍ന്നു. അതിലൂടെ അവ വിചിത്രമായൊരു കാര്യം കണ്ടെത്തി. ചൊവ്വയുടെ അന്തരീക്ഷത്തിലേക്കെത്തുന്ന മീഥേന്‍ വാതകം കൃത്യമായും മൂന്ന് പ്രത്യേക സ്ഥലങ്ങളില്‍നിന്നാണ് പുറപ്പെടുന്നത്. "അറേബിയാ ടെറാ" , "നിലിഫോസെ" , "സിര്‍ട്ടിസ് മേജര്‍" എന്നിവയായിരുന്നു ഇവ.


2005ല്‍, സുപ്രധാനമായ മറ്റൊരു കണ്ടെത്തല്‍, ചൊവ്വയെ സംബന്ധിക്കുന്നതായി "നാസ" നടത്തിയിരുന്നു- ചൊവ്വയില്‍ ജലം ദ്രാവകരൂപത്തില്‍ത്തന്നെയുണ്ട്. മണ്ണിനടിയിലാണെന്നു മാത്രം. ചൊവ്വയുടെ മധ്യരേഖാ മേഖലയിലാണ് ഈ ജലസാന്നിധ്യം കണ്ടെത്തിയത്. ശ്രദ്ധേയമായിത്തീര്‍ന്ന മറ്റൊരു കാര്യം, മുന്‍പറഞ്ഞ, മീഥേന്‍വാതകം ഉയര്‍ന്നുവരുന്ന മൂന്നു മേഖലകളും, ഈ മധ്യരേഖാമേഖലയ്ക്ക് തൊട്ടടുത്താണെന്നതായിരുന്നു. 19,000 മെട്രിക് ടണ്‍ മീഥേന്‍ ആയിരുന്നു ചൊവ്വയുടെ അന്തരീക്ഷത്തില്‍നിന്ന് മൊത്തമായും കണ്ടെത്തിയത്. എന്നാല്‍, ഇതിന്റെ പിന്നില്‍ പ്രവര്‍ത്തിക്കുന്നത് സൂക്ഷ്മജീവികളാണോ, അജീവിയമായ പ്രവര്‍ത്തനങ്ങളാണോ എന്നാണ് ഇനിയും കണ്ടെത്തേണ്ടതുണ്ട്. ഇതുതന്നെയാണ് "മംഗള്‍യാനി"ലുടെ ഇന്ത്യ ലക്ഷ്യമിട്ടതും.

ഇന്ത്യന്‍ ദൗത്യം

റിപ്പോര്‍ട്ട് കടപ്പാട്  : സി രാമചന്ദ്രന്‍, ദേശാഭിമാനി കിളിവാതില്‍

നമ്മുടെ ഒരവയവം പ്രവര്‍ത്തനരഹിതമാവുമ്പോഴാണ് അതിന്റെ പ്രാധാന്യം നാം മനസ്സിലാക്കുന്നത്. സാധാരണനിലയില്‍ പ്രവര്‍ത്തിക്കുമ്പോള്‍ നമുക്കത് അനുഭവവേദ്യമാകുന്നില്ല. നാം അകലങ്ങളുമായി വിവരവിനിമയം ചെയ്യുമ്പോഴാകട്ടെ, അകലങ്ങളിലെ കാഴ്ചകള്‍ സ്വീകരണമുറിയിലിരുന്നു കാണുമ്പോഴാകട്ടെ, കാലാവസ്ഥയുടെ വിവരങ്ങള്‍ മുന്‍കൂട്ടി അറിയുമ്പോഴാകട്ടെ, പ്രകൃതിദുരന്തത്തെക്കുറിച്ച് മുന്നറിയിപ്പു ലഭിക്കുമ്പോഴാകട്ടെ ഇതെല്ലാം ബഹിരാകാശ ഗവേഷണവുമായി ബന്ധപ്പെട്ട നേട്ടങ്ങളായി ഓര്‍മിക്കാറില്ല. ഏതെങ്കിലുമൊരു ദൗത്യം പരാജയപ്പെടുമ്പോഴാണ് കോലാഹലങ്ങളുണ്ടാകുന്നത്. ഇന്ത്യയുടെ ചാന്ദ്രയാന്‍ പദ്ധതിയുടെ വിജയം ഇന്ത്യന്‍ ജനതയുടെ ആത്മവീര്യവും ആത്മാഭിമാനവും അതിന്റെ പാരമ്യത്തിലെത്തിച്ച സംഭവമായിരുന്നു. കിഴക്കന്‍തീരത്ത് അടുത്തയിടെ വീശിയടിച്ച "ഫൈലിന്‍" കൊടുങ്കാറ്റിന്റെ ഗതി ഒരു ദൃക്സാക്ഷി വിവരണമെന്നോണം നല്‍കി, എല്ലാ പ്രതിരോധ പ്രവര്‍ത്തനങ്ങളും സമയബന്ധിതമായും കാര്യക്ഷമമായും നിര്‍വഹിക്കാന്‍ സഹായിച്ചതും നമ്മുടെ അപായമുന്നറിയിപ്പ് ഉപഗ്രഹങ്ങളുടെ കാര്യക്ഷമമായ പ്രവര്‍ത്തനമാണ്.

ഇന്ത്യയുടെ ഏറ്റവും പുതിയ ബഹിരാകാശപദ്ധതിയായി "മംഗള്‍യാന്‍ " എന്ന ചൊവ്വാ ഭ്രമണോപഗ്രഹവും രാജ്യത്തിന് ഏറെ അഭിമാനമാണ്. ചാന്ദ്രയാനിന്റെ വിക്ഷേപണം നാലുലക്ഷം കിലോമീറ്റര്‍ അകലമുള്ള ലക്ഷ്യത്തിലേക്കായിരുന്നുവെങ്കില്‍, ഇപ്പോഴത്തേത് ഏകദേശം 40 കോടി കിലോമീറ്റര്‍വരെ അകലേക്കാണ്. ലക്ഷ്യത്തിലെത്താന്‍ ഒരുവര്‍ഷത്തോടടുത്ത് സമയമെടുക്കും. ചാന്ദ്രയാന്‍ ചന്ദ്രന്റെ കാര്യത്തിലെന്നപോലെ മംഗള്‍യാന്‍ ചൊവ്വയുടെ അന്തരീക്ഷത്തെക്കുറിച്ചും സൗരയൂഥത്തിന്റെ ഉല്‍പ്പത്തിയെക്കുറിച്ചും പഠനത്തിനു സഹായകമായ വിവരങ്ങള്‍ നല്‍കുമെന്നു പ്രതീക്ഷിക്കുന്നു. ചൊവ്വയെക്കുറിച്ച് സമൂഹത്തില്‍ പ്രചരിപ്പിക്കപ്പെടുന്ന അബദ്ധജഡിലമായ അന്ധവിശ്വാസങ്ങളില്‍നിന്ന് കുറേപേരെങ്കിലും മോചിതരായേക്കുമെന്ന് പ്രതീക്ഷിക്കാം.

വിജയിച്ച ദൗത്യങ്ങള്‍:

1964ല്‍ നാസ വിക്ഷേപിച്ച മാരിനര്‍- 4, ഒരുവര്‍ഷത്തിനുശേഷം ചൊവ്വയുടെ സമീപത്തുകൂടെ കടന്നുപോകുകയും ചിത്രങ്ങള്‍ അയക്കുകയും ചെയ്തു.

1971ല്‍ സോവിയറ്റ് യൂണിയന്റെ മാഴ്സ്-3 എന്ന ബഹിരാകാശയാനം ചൊവ്വയെ വലംവയ്ക്കുകയും ചിത്രങ്ങള്‍ അയക്കുകയും ചെയ്തു. മാത്രമല്ല, ചൊവ്വയില്‍ ഇറങ്ങുകയുമുണ്ടായി.

1971ല്‍ നാസയുടെ മാരിനര്‍- 9 ചൊവ്വയെ വലംവയ്ക്കുകയും അന്നേരം അവിടെയുണ്ടായ പൊടിക്കാറ്റിന്റെ ചിത്രങ്ങളുടെ അഗ്നിപര്‍വതങ്ങളുടെ ചിത്രങ്ങളും ഭൂമിയിലേക്കയച്ചു. എന്നോ ഉണ്ടായിരുന്ന ഒരു ജലപ്രവാഹത്തിന്റെ ബാക്കിപത്രമെന്നോണം സ്ഥിതിചെയ്യുന്ന ഒരു ചാലിന്റെ ചിത്രവും അയക്കുകയുണ്ടായി.

1975ല്‍ നാസ വൈക്കിങ് 1, 2 എന്ന രണ്ടു യാനങ്ങള്‍ ചൊവ്വയിലേക്കയച്ചു. രണ്ടും 1976ല്‍ ചൊവ്വയുടെ പ്രതലത്തിലിറങ്ങി പര്യവേക്ഷണം നടത്തി. ജീവന്റെ സാന്നിധ്യത്തെക്കുറിച്ചുള്ള അന്വേഷണവും ഇതില്‍ പെട്ടിരുന്നു.

1966ല്‍ നാസ മാഴ്സ് ഗ്ലോബല്‍ സര്‍വേയര്‍ എന്ന ഉപഗ്രഹം ചൊവ്വയിലേക്കയച്ചു. അത് ഏതാണ്ട് ഒമ്പതുവര്‍ഷത്തില്‍പ്പരം സജീവമായി ഭ്രമണപഥത്തില്‍ നിലനിന്നു. അതേവര്‍ഷംതന്നെ (1996) മാഴ്സ് പാത്ത് ഫൈന്‍ഡര്‍, സോജോര്‍ണര്‍ എന്നീ രണ്ടു യാനങ്ങള്‍ ചൊവ്വയുടെ ഉപരിതലത്തിലിറങ്ങുകയും വിലപ്പെട്ട വിവരങ്ങള്‍ നല്‍കുകയും ചെയ്തു.

2001ല്‍ നാസ വിക്ഷേപിച്ച "മാഴ്സ് ഒഡിസി ഓര്‍ബിറ്റര്‍" ഇന്നും സജീവമായി ചൊവ്വയെ വലംവച്ചുകൊണ്ടിരിക്കുന്നു.

2003ല്‍ ഈസ (യൂറോപ്യന്‍ സ്പേസ് ഏജന്‍സി) വിക്ഷേപിച്ച "മാഴ്സ് എക്സ്പ്രസ്" ഇന്നും ഭ്രമണപഥത്തിലുണ്ട്. എന്നാല്‍ അതില്‍നിന്ന് ചൊവ്വയുടെ ഉപരിതലത്തിലേക്കയച്ച "ബീഗിള്‍- 2" എന്ന ഉപകരണം വീണുതകര്‍ന്നു.

2005ല്‍ നാസ വിക്ഷേപിച്ച "മാഴ്സ് റിക്കൊണൈസന്‍സ് ഓര്‍ബിറ്റര്‍" ഇന്നും സജീവമാണ്.

2008ല്‍ നാസ വിക്ഷേപിച്ച "മാഴ്സ് ഫിനിക്സ്" ചൊവ്വയുടെ ധ്രുവപ്രദേശത്തെക്കുറിച്ചു പഠിക്കാനുള്ളതായിരുന്നു.

2011ല്‍ നാസ ചൊവ്വയിലേക്കയച്ച "ക്യൂരിയോസിറ്റി"യും "മാഴ്സ് സയന്‍സ് ലബോറട്ടറി"യും സ്തുത്യര്‍ഹമായ പ്രവര്‍ത്തനങ്ങളാണു നടത്തിയത്.

പരാജയപ്പെട്ട ദൗത്യങ്ങള്‍: 

1988ല്‍ സോവിയറ്റ് യൂണിയന്‍ അയച്ച ഫോബോസ്- 1, ഫോബോസ്- 2 എന്നീ യാനങ്ങള്‍ അതിന്റെ യാത്രക്കിടയില്‍ പ്രവര്‍ത്തനക്ഷമമല്ലാതായി.

1992ല്‍ നാസയുടെ "മാഴ്സ് ഓര്‍ബിറ്റര്‍" യാത്രക്കിടയില്‍ പരാജയപ്പെട്ടു.

1996ല്‍ റഷ്യ വിക്ഷേപിച്ച ചൊവ്വായാനം ഭൂമിയുടെ ഗുരുത്വാകര്‍ഷണത്തില്‍നിന്നു കടന്നുപോകുന്നതില്‍ പരാജയപ്പെട്ടു.

1998ല്‍ അയച്ച ജപ്പാന്റെ "നോസോമി" പരാജയപ്പെട്ടു.

1999ല്‍ അമേരിക്കയുടെ രണ്ടു ദൗത്യങ്ങള്‍ പരാജയപ്പെട്ടു. "മാര്‍സ് ക്ലൈമറ്റ് ഓര്‍ബിറ്റര്‍", "മാഴ്സ് പോളാര്‍ലാന്‍ഡര്‍" എന്നീ പദ്ധതികള്‍ ചൊവ്വയില്‍ ഇടിച്ചുവീണു തകര്‍ന്നു.

2003ല്‍ യൂറോപ്യന്‍ സ്പേസ് ഏജന്‍സിയുടെ "ബീഗിള്‍- 2" ചൊവ്വയുടെ ഉപരിതലത്തില്‍ വീണുതകര്‍ന്നു.

2011ല്‍ റഷ്യയുടെ "ഫോബോസ്-ഗ്രണ്‍ട്" എന്ന ദൗത്യം, ചൊവ്വയുടെ ചന്ദ്രനായ ഫോബോസില്‍ ഇറങ്ങി അവിടുത്തെ മണ്ണുശേഖരിച്ച് അത് ഭൂമിയില്‍കൊണ്ടുവരിക എന്നതായിരുന്നു. ഗ്രണ്‍ട് എന്നാല്‍ റഷ്യന്‍ഭാഷയില്‍ മണ്ണ് എന്നാണ്. സോവിയറ്റ് യൂണിയന്റെ ഒരു യാന്ത്രികദൗത്യം പണ്ടുകാലത്ത് നമ്മുടെ ചന്ദ്രനില്‍ ഇറങ്ങി മണ്ണ് ശേഖരിച്ചു കൊണ്ടുവന്നതിന്റെ ഓര്‍മപോലെയാണിത്. പക്ഷേ ഇപ്രാവശ്യം ഇത് പ്രാരംഭത്തില്‍ത്തന്നെ അലസിപ്പോയി.

ഇനിയും അറിയാന്‍ സന്ദര്‍ശിക്കൂ,

Mars Orbiter Mission - ISRO

Mars Orbiter Mission on Wikipedia, the free encyclopedia

Exploration of Mars on Wikipedia, the free encyclopedia

മംഗൾയാൻ - വിക്കിപീഡിയ, ഒരു സ്വതന്ത്ര വിജ്ഞാനകോശം.

ചൊവ്വ - വിക്കിപീഡിയ, ഒരു സ്വതന്ത്ര വിജ്ഞാനകോശം.

ചൊവ്വയില്‍ച്ചെന്ന് രാപ്പാര്‍ക്കാം!

ചൊവ്വയില്‍ച്ചെന്ന് രാപ്പാര്‍ക്കാം! 

റിപ്പോര്‍ട്ട് കടപ്പാട് : എന്‍ എസ് അരുണ്‍കുമാര്‍,  ദേശാഭിമാനി കിളിവാതില്‍

2022ല്‍, തെളിഞ്ഞ ആകാശത്തിലേക്ക് കുതിച്ചുയരുന്ന ഒരു റോക്കറ്റില ഒരുകൂട്ടം മനുഷ്യര്‍ ഭൂമിയില്‍നിന്നു ചൊവ്വാഗ്രഹത്തിലേക്ക് യാത്രയാകും. ഒമ്പതുമാസത്തെ ബഹിരാകാശയാത്ര കഴിഞ്ഞ് അവിടെയെത്തുമ്പോള്‍, അവര്‍ക്ക് ശിഷ്ടജീവിതം കഴിക്കാനുള്ളതെല്ലാം അവിടെ ഒരുക്കിവച്ചിട്ടുണ്ടാവുമെന്നാണ് യാത്രയുടെ സംഘാടകരുടെ അവകാശവാദം. മാനംമുട്ടുന്ന വലിയ മകുടങ്ങള്‍ മുകളിലേക്ക് തള്ളിയുയര്‍ന്ന നില്‍ക്കുന്ന വിശാലമായ വലിയ കെട്ടിടങ്ങളിലേക്കാണ് അവര്‍ എത്തിച്ചേരുകയത്രെ. നെതര്‍ലന്‍ഡ് ആസ്ഥാനമായ "മാര്‍സ് വണ്‍" എന്ന കമ്പനിയാണ് ചൊവ്വയെ മനുഷ്യവാസത്തിനായി പരുവപ്പെടുത്തുന്നതിനും അവിടേക്ക് ആളെ അയക്കുന്നതിനുമായി പദ്ധതി തയ്യാറാക്കിയിരിക്കുന്നത്.

നിലവില്‍ ഒരു കമ്പനിയായാണ് പ്രവര്‍ത്തിക്കുന്നതെങ്കിലും, ലാഭേച്ഛകൂടാതെ പ്രവര്‍ത്തിക്കുന്ന ഒരു സന്നദ്ധസംഘടനയായാണ് "മാര്‍സ് വണ്‍" അതിന്റെ നീക്കുപോക്കുകള്‍ നടത്തിവരുന്നത്. ഡച്ച് ഗവണ്‍മെന്റിന്റെ അംഗീകാരത്തോടെ പ്രവര്‍ത്തിക്കുന്ന "മാര്‍സ് വണി"ന് ഇക്കാര്യത്തില്‍ ലാഭേച്ഛയില്ലെന്നാണ് വെബ്സൈറ്റില്‍ പ്രസിദ്ധപ്പെടുത്തിയിരിക്കുന്ന അതിന്റെ നിയമാവലികള്‍ സൂചിപ്പിക്കുന്നത്. 20 വര്‍ഷത്തെ ബൃഹദ്പദ്ധതിയാണ് ചൊവ്വയില്‍ മനുഷ്യവാസം യാഥാര്‍ഥ്യമാക്കുന്നതിനായി തയ്യാറാക്കിയിരിക്കുന്നതത്രെ.

2013 ആഗസ്ത് 13 വരെയുള്ള കണക്കനുസരിച്ച് 1,65,000 പേര്‍ ചൊവ്വാവാസികളാവാന്‍ താല്‍പ്പര്യം പ്രകടിപ്പിച്ചുകൊണ്ട് അംഗത്വമെടുത്തതായാണ് "മാര്‍സ് വണി"ന്റെ വെബ്സൈറ്റ് സൂചിപ്പിക്കുന്നത്. അംഗത്വത്തിനായി അപേക്ഷിക്കുന്നവര്‍ ഏതു രാജ്യക്കാരാണ് എന്നതിന്റെ അടിസ്ഥാനത്തിലാണ് അംഗത്വഫീസ് നിശ്ചയിച്ചിട്ടുള്ളത്. ചൊവ്വാഗ്രഹത്തിലെ മനുഷ്യവാസത്തിനുള്ള പശ്ചാത്തലസൗകര്യങ്ങള്‍ ഒരുക്കാന്‍ 2016ല്‍ ആദ്യ റോക്കറ്റ്, നിര്‍മാണസാമഗ്രികളുമായി ഭൂമിയില്‍നിന്ന് ചൊവ്വയിലേക്ക് യാത്രതിരിക്കുമെന്നും കമ്പനി അവകാശപ്പെടുന്നു. 2021നകം നിര്‍മാണപ്രവൃത്തികള്‍ പൂര്‍ത്തീകരിക്കാനാണ് പരിപാടി. 2022ല്‍, ചൊവ്വാവാസികളാവാനുള്ളവരുടെ ആദ്യസംഘം ഭൂമിയില്‍നിന്നു യാത്രതിരിക്കും. അവസാനത്തെ സംഘം 2033ലും. "സ്പെയ്സ് - എക്സ്" എന്ന സ്വകാര്യകമ്പനിയുടെ ഏറ്റവും ശക്തമായ റോക്കറ്റ് പരമ്പരയില്‍പ്പെട്ട "ഫാല്‍ക്കണ്‍ ഹെവി" റോക്കറ്റുകളെയാണ് ഇതിനായി ഉപയോഗിക്കുന്നത്. ഇതിനെല്ലാം സാങ്കേതിക പരിമിതികള്‍ ഏറെയില്ലേ എന്ന ചോദ്യത്തിന് 2022വരെ കാത്തിരിക്കൂ എന്നാണ് "മാര്‍സ്വണി"ന്റെ വക്താക്കള്‍ പറയുന്നത്.

ഭൗമജീവന്‍ ചൊവ്വയിലോ?

ഭൗമജീവന്‍ ചൊവ്വയിലോ?

റിപ്പോര്‍ട്ട് കടപ്പാട്: സാബുജോസ്,  ദേശാഭിമാനി കിളിവാതില്‍

ഭൂമിയില്‍ ജീവന്റെ വിത്തു പാകിയത് ചൊവ്വയില്‍നിന്നു പുറപ്പെട്ട ഒരു ഉല്‍ക്കാശിലയാണത്രെ! ഭൗമജീവന്റെ ഉത്ഭവം ചൊവ്വയില്‍നിന്നാണെന്നതിന്റെ തെളിവു ലഭിച്ചുവെന്ന അവകാശവാദവുമായി രംഗത്തെത്തിയിരിക്കുന്നത് അമേരിക്കയിലെ വെസ്റ്റ് ഹെയ്മര്‍ ഇന്‍സ്റ്റിറ്റ്യൂട്ട് ഓഫ് സയന്‍സ് ആന്‍ഡ് ടെക്നോളജിയിലെ ജിയോകെമിസ്റ്റ് പ്രൊഫ. സ്റ്റീവന്‍ബെന്നറാണ്. ഇറ്റലിയിലെ ഫ്ളോറന്‍സില്‍ ആഗസ്ത് അവസാനവാരം നടന്ന ഗോള്‍ഡ്ഷ്മിറ്റ് 2013 സമ്മേളനത്തിലാണ് അദ്ദേഹം ഈ പ്രസ്താവന നടത്തിയത്.

ഉല്‍ക്കാശിലകളില്‍ കണ്ടെത്തിയ മോളിബ്ഡിനം മൂലകത്തിന്റെ ഓക്സീകരിക്കപ്പെട്ട ധാതുരൂപമാണ് ഇതിനു തെളിവായി പ്രൊഫ. ബെന്നര്‍ അവതരിപ്പിക്കുന്നത്. ഓര്‍ഗാനിക് സംയുക്തങ്ങള്‍ പിന്നീട് ജീവകോശങ്ങളായി രൂപാന്തരപ്പെടുന്നതിനുള്ള ഉല്‍പ്രേരകമായി പ്രവര്‍ത്തിച്ചത് ഈ ധാതുവാണത്രെ. 300 കോടി വര്‍ഷം മുമ്പാണിത്. ഭൂമിയില്‍ ജീവന്‍ ഉത്ഭവിച്ചുവെന്നു കരുതപ്പെടുന്ന ആ കാലത്ത് ഭൗമാന്തരീക്ഷത്തിലെയും മണ്ണിലെയും ഓക്സിജന്റെ അളവ് നാമമാത്രമായിരുന്നു. അങ്ങനെ വരുമ്പോള്‍ ഓക്സീകരിക്കപ്പെട്ട മോളിബ്ഡിനം ധാതു ഭൂമിയിലുണ്ടാകാന്‍ സാധ്യതയില്ല. എന്നാല്‍ ഈ കാലഘട്ടത്തില്‍ ചൊവ്വയിലെ സ്ഥിതി അങ്ങനെയായിരുന്നില്ല. ഓക്സിജന്‍ സമൃദ്ധമായ, കട്ടിയുള്ള അന്തരീക്ഷം ചൊവ്വയ്ക്കു ചുറ്റും നിലനിന്നിരുന്നു. ഗ്രഹത്തിന്റെ വലുപ്പക്കുറവും ഭൂമിക്കുള്ളതുപോലെയുള്ള കാന്തികക്ഷേത്രത്തിന്റെ അഭാവവും കാരണം ചൊവ്വയുടെ അന്തരീക്ഷം ക്രമേണ നഷ്ടപ്പെടുകയാണുണ്ടായത്.

300 കോടി വര്‍ഷം മുമ്പ് ഓക്സിജന്‍ സമ്പന്നമായ ചൊവ്വയില്‍നിന്നു പുറപ്പെട്ട ഒരു ഉല്‍ക്കാശിലയാണ് ഭൂമിയില്‍ ജീവന്റെ വിത്തു പാകിയതെന്നാണ് പ്രൊഫ. ബെന്നര്‍ വാദിക്കുന്നത്. ജീവന്റെ എല്ലാ രൂപങ്ങളും ഉത്ഭവിച്ചത് ഓര്‍ഗാനിക് സംയുക്തങ്ങളില്‍നിന്നാണ്. എന്നാല്‍ ഓര്‍ഗാനിക് സംയുക്തങ്ങളിലേക്ക് ഊര്‍ജം പ്രവഹിക്കുമ്പോള്‍ അവ നേരിട്ട് ജീവനായി പരിവര്‍ത്തനം ചെയ്യുകയല്ല, മറിച്ച് ടാര്‍, അസ്ഫാള്‍ട്ട്പോലെയുള്ള സങ്കീര്‍ണ ഘടനയുള്ള സംയുക്തങ്ങളായി മാറുകയാണ് ചെയ്യുന്നത്. ഈ പ്രവര്‍ത്തനത്തിന്റെ വേഗം വര്‍ധിപ്പിക്കുന്ന ഉല്‍പ്രേരകങ്ങളായി പ്രവര്‍ത്തിക്കുന്നത് ബോറോണ്‍, മോളിബിഡിനം തുടങ്ങിയ മൂലകങ്ങളാണ്. ചൊവ്വയിലെ ഉല്‍ക്കാശിലകളില്‍ ധാരാളമായി ബോറോണ്‍ കണ്ടെത്തിയിട്ടുണ്ട്. ഇപ്പോള്‍ മോളിബ്ഡിനവും കണ്ടെത്തിയതായാണ് പ്രൊഫ. ബെന്നര്‍ അവകാശപ്പെടുന്നത്. ജീവന്‍ ഒരു കൊച്ചു കല്ലില്‍ ചൊവ്വയില്‍നിന്ന് ഭൂമിയില്‍ പറന്നിറങ്ങിയാതാണെന്നാണ് അദ്ദേഹത്തിന്റെ അവകാശവാദം!

ഇതിനിടെ യൂറോപ്യന്‍ സ്പേസ് ഏജന്‍സിയുടെ ചൊവ്വാ പര്യവേക്ഷണ പേടകമായ മാര്‍സ് എക്സ്പ്രസ് ഓര്‍ബിറ്റര്‍ ചുവന്ന ഗ്രഹത്തിന്റെ ഉപരിതലത്തിനു കീഴെ 400 കോടി വര്‍ഷം മുമ്പുണ്ടായിരുന്ന സമുദ്രത്തിന്റെ അടയാളങ്ങള്‍ തിരിച്ചറിഞ്ഞു. 400 കോടി വര്‍ഷം മുമ്പ് ചൊവ്വാഗ്രഹത്തിന്റെ താപനില ഇന്നത്തെക്കാള്‍ ഉയര്‍ന്നതും ജലത്തെ ദ്രാവകാവസ്ഥയില്‍ നിലനിര്‍ത്താന്‍ പര്യാപ്തവുമായിരുന്നു. അതുകൂടാതെ, 300 കോടി വര്‍ഷം മുമ്പ് ഒരു വലിയ ധൂമകേതു പതിച്ചതുവഴി ഉണ്ടായ ഒരു കൊച്ചുസമുദ്രത്തിന്റെ അടയാളങ്ങളും ചൊവ്വയില്‍ കണ്ടെത്തിക്കഴിഞ്ഞു. ധൂമകേതുവിന്റെ ആക്രമണം ധ്രുവമേഖലയിലെ മഞ്ഞുരുകാന്‍ ഇടയാക്കിയതാണ് ഈ കൊച്ചുസമുദ്രത്തിന്റെ പിറവിക്കു കാരണമായത്. മാര്‍സ് പ്രോബില്‍ ഘടിപ്പിച്ചിട്ടുള്ള മാര്‍സിസ് റഡാറാണ് ഈ പ്രാചീന സമുദ്രത്തിന്റെ അടയാളങ്ങള്‍ ഒപ്പിയെടുത്തത്. രണ്ടുവര്‍ഷം തുടര്‍ച്ചയായി ചൊവ്വാഗ്രഹത്തിന്റെ വടക്കന്‍ സമതലത്തില്‍ നടത്തിയ പരീക്ഷണങ്ങളെത്തുടര്‍ന്നാണ് ഈ കണ്ടെത്തല്‍.

ഈ പ്രദേശത്തെ മണ്ണിന്റെ താഴ്ന്ന സാന്ദ്രതയാണ് ശാസ്ത്രജ്ഞരെ ആകര്‍ഷിച്ചത്. 2011 ഡിസബറില്‍ ഓസ്ട്രേലിയയില്‍ നടത്തിയ അസ്ട്രോബയോളജിസ്റ്റുകളുടെ സമ്മേളനം ചൊവ്വാഗ്രഹത്തിന്റെ മൂന്നുശതമാനം ഭാഗം വാസയോഗ്യമേഖല യാണെന്ന നിഗമനത്തിലെത്തിയിരുന്നു. എന്നാല്‍, ഈ മേഖല ഗ്രഹോപരിതലത്തിനടിയിലാണെന്നതാണ് ഏറെ കൗതുകം. ഈ മേഖലയില്‍ ഏകകോശ ജീവികള്‍മുതല്‍ മൂട്ടകള്‍വരെയുള്ള ജീവികളുണ്ടാകാനുള്ള സാധ്യത വളരെയധികമാണ്. ഭൂമിക്കുള്ളതുപോലെ ശക്തമായ കാന്തികക്ഷേത്രം ചൊവ്വയ്ക്കു ചുറ്റും ഇല്ലാത്തതുകൊണ്ട് സൗരവികിരണങ്ങളുടെ ആക്രമണത്തില്‍നിന്ന് ഗ്രഹത്തിന് രക്ഷപ്പെടാന്‍ കഴിയില്ല. അതുകൊണ്ടുതന്നെ ഗ്രഹോപരിതലം വാസയോഗ്യവുമല്ല. സൂര്യനില്‍നിന്ന് ഏകദേശം 22.5 കോടി കിലോമീറ്റര്‍ അകലെയുള്ള ചൊവ്വയുടെ ഉപരിതല താപനില ജലത്തെ ദ്രാവകാവസ്ഥയില്‍ നിലനിര്‍ത്താന്‍ പര്യാപ്തമല്ലെങ്കിലും ഉപരിതലത്തിനടിയിലെ ഉയര്‍ന്ന മര്‍ദവും അതുണ്ടാക്കുന്ന കൂടിയ ചൂടും ഒഴുകുന്ന ജലത്തെ നിലനിര്‍ത്താന്‍ കഴിയുന്ന തരത്തിലാണുള്ളത്. ഗ്രഹകേന്ദ്രത്തില്‍നിന്നു പുറപ്പെടുന്ന താപം ബാക്ടീരിയങ്ങള്‍പോലെയുള്ള സൂക്ഷ്മജീവികളുടെ വളര്‍ച്ചയ്ക്ക് ഗുണകരമാണ്. നാസയുടെ ന്യൂക്ലിയര്‍ സ്പേസ് പ്രോബും മാര്‍സ് സയന്‍സ് ലബോറട്ടറിയും ക്യൂരിയോസിറ്റി റോവറുമെല്ലാം ചൊവ്വയിലെ ജീവനെത്തന്നെയാണ് തെരയുന്നത്.

ഉപരിതലം കുഴിച്ചു പരിശോധിക്കുന്നതിലൂടെ സൂക്ഷ്മജീവികളുടെ ഫോസിലുകള്‍ കണ്ടെത്താന്‍ കഴിഞ്ഞേക്കും. 2009ല്‍ത്തന്നെ ചൊവ്വയുടെ അന്തരീക്ഷത്തില്‍ മീഥേയിന്‍ ബാഷ്പത്തിന്റെ സാന്നിധ്യം തിരിച്ചറിഞ്ഞിരുന്നു. മീഥേയിന്‍ സാന്നിധ്യം വിരല്‍ചൂണ്ടുന്നത് ജൈവമണ്ഡലത്തിന്റെ സാധ്യതയിലേക്കാണ്. ഉപരിതല പാളികള്‍ക്കിടയില്‍ ഇപ്പോഴും ജീവനോടെ അവശേഷിക്കുന്ന സൂക്ഷ്മജീവികളിലേക്കാണ്. ഒരുകാര്യം വ്യക്തമാണ്. ഭൂമിയെപ്പോലെത്തന്നെ ചൊവ്വയും അതിന്റെ മാതൃനക്ഷത്രമായ സൂര്യന്റെ വാസയോഗ്യമേഖലയില്‍ത്തന്നെയാണുള്ളത്. അതുകൊണ്ടുതന്നെ അവിടെ ജീവനുണ്ടാകാനുള്ള സാധ്യത വളരെയധികമാണ്. ജീവന്റെ നിര്‍വചനം എത്ര വിചിത്രമാണെങ്കിലും!